OTZIERI
Otieri in d-un’adde est collocada
coronada de montes e collinas
custruida cun bellas palatzinas
de arte noa e anticuada.Dai s'una a s’átera contrada
est tottu in faladorza e iscalinas,
e in sos oros sas mandras porchinas
dai tottu porcopoli giamada.Tenet fertiles terras pro pastura
e masones de robba a tipu variu
cun ortos chi abbundan de ‘irdura.E nois unu muru leggendariu,
tenimus, naran sos diseredados
chi est su muru de su semenariu
...... ue s'arrumban sos disoccupados.In mesu de sa idda,sa funtana
monumentu de marmaru piccadu,
in su presente che in su passadu
a su sedidu la passat sa gana.Sa giuventura grasciosa e galana
Est ispiju de bonu custumadu.
Oe ch’est festa corittu in broccadu
‘ogan antigas bunneddas de lana.Su benistante pro Nostra Signora
faghet sa festa de ogni manera
e invitat istranzos dai fora.Ma su zoronateri, una lumera
non la podet atzèndere in cust'ora
solu che una lagrima sintzera
....pro te, Vergine Santa Protettora.
Salvatore Chessa - Ozieri (Premio Ozieri 1956)