A Otieri terra de poesia
1
Otieri: comente in sos beranos
sos fioridos fruttales ti dan(a)
undadas de profumu; risulana
gemma de Logudoro, tue imbias
su profumu de milli poesias,
s'incantu tou raru a largas manos.2
Poesias de seros de istiu,
de passizadas,de feminas raras,
de festas pobuladas e de garas,
de fattorias in su campu attesu,
de tancas mannas cun su riu in mesu,
de 'accas pasculende accantu a riu.3
Poesias de campos laorados,
de ninnare 'e ispigas,de trattores,
de trebbias in motu, de suores
de trabagliu costante, de cantones
chi naran de ispera e passiones
cando lampizan falches e arados.4
Poesias de 'etzos sempre amigos
de Cantareddu, inue affiotados,
arrejonende 'e sos tempos passados
si setzin cun sas manos subra matta,
ponzende in mustra corittu e cravatta
berritta longa cun fresis antigos.5
Dae sos altos cipressos ch'in motu
ponen sa chima insoro a bentu e frina
sa tua festeggiada Madonnina
mandat de poesia tanta lughe,
e in s'amore de sa Santa Rughe
bizat e dat rimedios a totu.
Foricu Sechi – Nughedu S.Nicolò (Premio Ozieri 1956)